Hvert næst?

Skýjaglópur er manneskja sem er alltaf að hugsa um eitthvað annað en það sem er fyrir framan nefið á sér, alltaf að dreyma. Mig dreymir.

Ég var að horfa á Discovery í vetur og það sat í mér setning sem einhver gamall kall sagði, "your passport is only valid in this life". Vegabréfið gildir bara í þessu lífi. Það er bara núna sem er hægt að nota það, ekki seinna þegar allt er komið á hreint, allt er sorterað og frágengið, skólinn, vinnan, karríerinn, afborganirnar, vísareikningurinn, búið að laga til í geimslunni, laga bílinn eða hvað það nú var sem er á listanum. Bara hægt núna, ekki seinna.

Mig dreymir. Um ferðalög og framandi slóðir. Mig dreymir um staði sem ég hef ekki séð, hluti sem ég á eftir að upplifa, fólk sem ég á eftir að kynnast. Mig dreymir um það að verða aftur fjallageit, labba um fjöll og fyrnindi. Mig dreymir um að enda næsta ár með því að labba í Nepal og sjá Everest.

Svo ég ætla að láta mig dreyma. Um fjall sem stendur upp úr skýjunum langt í austri. Og allskonar annað.